Chartes de Saint-Bertin

Parmi les nombreuses chartes de l’abbaye de Saint-Bertin qui citent des Wissocq, voici la transcription de 13 d’entre elles, comprises entre 1385 et 1521.

 

Charte du 19 mai 1385 [1]

Sachent tous chil qui ceste charte partie verront ou orront que sire Jehan de Wissoc, demisele Maroie se feme, Rikart Darleem, demisele Maroie se feme et Willaume Le Reude et demisele Jehane sa feme ont conjointement et tant comme a chascun toucke ou puet touckier, donnai et octroiiet a hiritaule cense bien et a loy a Jehan Blankart une masure avoec quarante deux mesures de terre ou environ qui y astierent gisants a Moerkines[2] : une partie desous mons Denieles, une partie desoubz le capellain de Ruhoud, lesquelles sire Vincent Boullard souloit tenir en son vivant, et che pour sis libvres et quinze sols monnoye de Flandres de rente par an hiritaulement a payer a trois termes en lan, assavoir est, Noel, Pasques et St Jehan, dont les quatre libvres et douze deniers par an sont et appartienent au dit sire Jehan de Wissoc pour se part et portion et les chinquante quatre sols sont et appartienent as dessus dis Rikard Darleem et a Willaume Le Reude, a cascun la moitié, et est lune rente aussi avant assensée comme lautre, et y doit li dis Jehans Blankart mettre en assennement vint libvres monnoye de Flandres dedens ches quatre ans prochain venants, lequelle rente devant dite li dis Jehans recognoist sour le dite masure et terres et sour tout l’assenement que il y mettera, et partant lui ont lidit conjoint donner enconvens de quiter et warandir ledite masure et terres par-dessus données a hiritaule cense en bien et en pais cauers tous et a le loy, us et coustume du lieu, sauve che que li dis Jehans Blankart doit payer toutes les rentes, dettes, redevanlates et coustume du seigneur qui yssent de le dite masure et terres, par desseure le rente devant dite. Che fu fait et cognut pardevant la loy de Moerkines, et y fu Clay Emond comme baillieux et ou lieu du seigneur, et comme censiers Jehans Delattre, Mikiel Blankart, Jaquemin Descamps, Jehan Le Roy et Jehan Goetrauwe, en lan de grace mil trois chens quatrevins et chincq, le xix^e jour de may.

 

Charte du 9 juillet 1407 [3]

Chest le rapport et denombrement que je Clay de Wissoc escuier seigneur de Nieuverlet el nom et comme advoué et ayans le bail, garde et gouvernement de Julien de Le Steenstraet meuredans, fil et heritier de Gille de Le Steenstraet, jadis son père, fay et baille a pourveus et discres mes tres chiers et honnorés seigneurs messeigneurs les religieux abbé et couvent de l’église St Bertin en St Omer de ce que je el nom que dessus tieng et enteng a tenir deulx et de leur dicte église noblement en ung fief et hommage, est assavoir, quatre mesures et le tierch dune mesure de terre gisant au terroir de Wiserne aboutant a le terre de le dicte église au les vers St Omer et vers mer a le terre Pierre Plais et tenant de bout a le verde voye, lequel fief je tieng de mes dis seigneurs, comme dit est, par eulx paiont a cause de relief quant le cas y esquiet le valeur et despoulle dudit fief pour ung an et cambellage coustumier avec service de plais en leur salle a St Bertin et ailleurs ou il appartenra avec mes pers et compagnons toutes les fois que je en seray requis ou adjourné souffissanment, duquel fief je fay rapport devers mes dis seigneurs pour et au nom dudit meuredans et le adveue a tenir deulx et de leur dite eglise par le manière dicte, et se mestiers est le promech a faire ratifier et approuver par ledit meuredans luy venu en aage. En tesmoing de ce je ay mis men scel a cest present rapport fait et escript neuvieme jour de jullet lan mil quatre cens et sept.

 

Charte du 9 juillet 1407 [4]

Chest le rapport et dénombrement que je Jehan de Wissoc fil de Clay et héritier de feue demiselle Marie Daverhout, jadis me mère, que Dieux pardonnist, fay et baille a pourveux et discres mes très chiers et honnorés seigneurs messeigneurs les religieux abbé et couvent de l’église de St Bertin en St Omer de ce que je tieng et enteng a tenir deulx et de leur dicte église noblement et en un seul fief et hommage, est assavoir une pieche de prey, que on dist et nomme les prez de Maubreucq gisans en dessoux de Bainghem contenant six mesures et le tierch dune mesure ou environ, lequel fief je tieng et adveue a tenir de mes dis seigneurs par eaulx paiant a cause de relief quant le cas y esquiet dix libvres parisis de relief et cambellage coustumier avec serviche de plais en leur salle a St Bertin et ailleurs ou il appartenra avec mes pers et compaignons toutes les fois que je en seray requis ou adjournés souffisanmant, duquel fief jay fay rapport devers mes dis seigneurs et le adveue a tenir deulx et de leur dicte église par le manière dessus dicte, en tesmoing de ce jay mis mon scel a cest mien present rapport fait et escript le neuvieme jour de jullet lan mil quatre cens et sept.

 

Charte du 4 mai 1410 [5]

Sachent tout chil que cheste chartre partie verront ou orront que Xpiene de Lyusene veuve de Alisin Clais par sen lay advoé Jehan Lefeure dit Lucas a vendu et werpi bien et a loy hiritaulement et a tous jours a Adam Levasseur une mesure de terre ahanable gisant a Reumont aboutant vers solelg a le terre Pieres Deliane et vers mer a le terre Gilles de Ruminghem et damont a le terre des religieux de St Bertin et en a monté le vente dix frans…… Chou fu fait vendu et werpi bien et a loy par devant le loy Jehan de Wissoc escuyer fieu de sire Niclay de Wissooc de sa singnorie de Kelmes…… en lan de grace mil quatre chens et dix le quatraime jour du mois de mai.

 

Charte du 22 avril 1412 [6]

Sachent tout chil qui cheste chartre partie verront ou orront que Jehan de Lanne a donné a hiritable chense bien et a loy a demiselle Yde de Floringhem vesve de feu Oste de Lanne trois quarterons de corthil ou environ…… chou fu fait et recognut bien et a loy par devant le loi de Jehan de Wissoc a Kelmes…… en lan mil quatre chens et douze [le 22 avril[7]].

 

Charte du 14 juillet 1425 [8]

Sachent tout cil qui ceste chartre partie verront ou orront que noble dame madame Jehenne de Wissoc vesve de feu monseigneur de Boncoud en son vivant chevalier par son advoué Jehan de le Mer et noble homme Clay de Wissoc escuier seigneur de le Nieurlet et demoiselle Jaquemine de Ste Audegonde se femme ont conjointement ensemble donné et ottroyé a heritaule cense bien et a loy a Guerard du Fossé demourant à Tadinghem, ung manoir enclos de haies contenant deux mesures sept verges de terre ou environ tenu de messieurs les religieux de St bertin a cause de leur seigneurie de Quelmes, gisant au dit lieu de Tadinghem, faisant front sur le rue entre le manoir Baudin le Pap de Tadinghem, oest et west Jaque le Lardeur, zut Claude de Wissoc et ses consors et ce pour soixante dix sols parisis de rente par an heritaulement a paier chascun an a le Toussaint…………… ce fut fait et passé par devant le loy et en le seigneurie de mes dis seigneurs de St Bertin qu’ils ont audit lieu de Quelmes…………… le XIIII^eme jour de juillet lan mil quatre cens et vint cinq.

 

Charte du 17 juillet 1494 [9]

A tous ceulx qui ces presentes lettres verront ou orront Meugin Vincq lieutenant de Jehan Le Ratte bailli de Coiecques pour venerables et discretz seigneurs mess^rs les religieux abbé et couvent de leglise St Bertin en St Omer salut, – savoir faisons que aujourdhuy par devant nous et en la présence de Ernoul Paillart, Robert Hapiette, hommes liges, Marcq Deroie desservant pour le fief Jacquemart de Lannoy, Jehan Brunet lainé desservant pour le fief Jehan de Bavincove, et Jehan Brunet le josne desservant pour le fief Pierquin de Heuchin, tous hommes liges jugens en la court et salle abbatiale de mesdis S^grs,

Comparut en sa personne messire Anthoine de Gapanes[10] chevalier sgr dudit lieu de Gapanes, de Bommi, de Haravennes et de Ponces en partie, et recognut que pour son proffit mieulx faire que lessier, survenir a certains ses affaires necessaires auxquels autrement plus profitablement ne povoit survenir que en faisant la vendition après touchié et qui est que pour et moiennant le pris et somme de quatre vingt livres monnoie courante en Artois de quarante gros pour le livre quil en nostre presence a confessé de avoir eu et receu comptant en bon or et argent bien compté et nombre de Pierre Hochede demourant a Coiecque procureur de leglise St Bertin en St Omer des deniers venans de venerable personne sire Alard Bart religieux dudit lieu de St Bertin et a luy appartenant tellement que en nostre presence icellui S^r s’en est tenu pour comptent, se la bien et plainement payé dudit Hochede au nom de leglise dudit St Bertin len quittans dicelle somme icellui sire Alard le dit Pierre audit nom et tous a qui quittance en appartient, icelluy comparant seigneur a pour ces causes vendu et par devant nous recognoist aincoires avoir vendu bien justement lealment et sans fraude audit Pierre Hocede pour au nom proffit et intention de la dicte eglise heritablement a rachat apres declairiet, six livres quatorze sols quatre deniers monnoie dicte de rente heritable annuelle et perpetuelle qui se payera chacun an a deux termes en lan et a chascun terme le mottié assavoir aux dix septiemes jours de fevrier et de jullet, permier terme commenchant audit 17^e jour de febvrier de lan mil quatre cens quatre vingt et quatorze, le second au 17^e de jullet prochain apres ensievant et ainsi en continuant dan en an et de terme en terme heritablement, saulf ledit rachat que icelui S^r vendeur ses hoirs ou ayans cause porront faire quant il leur plaira toute une fois par payant rendant et remboursant a ladite eglise de St Bertin, ses procureur, receveur, ou portant de cestes en leur nom ladite somme de quatre vingt livres monnoie dicte, tous arrieraiges, termes passez et les certaines a reste et cours de temps avoec tous frais raisonnables de ces presentes lettres a l’ordonnance de justice, et pour la seureté de bien payer, payer icelle rente chascun an, comme dit est, par icelui S^r comparant vendeur, ses hoirs ou ayans cause a iceluy S^r vendeur dessus nommé, submit et obligié, submet et oblige de fait par devant nous tous ses biens, moebles, immoebles, cateulx, et heritaiges, et en faulte de biens moebles, gringneur seureté, et about especial, non derogant au general, ne le general a lespecial ung certain fief et heritaige cottier quil a et tient de mesdis S^rs de St Bertin audit lieu de Coiecque, terroir, dimage et pays environ que on nomme le fief et escleche de la prevoté de Coiecque qui se comprent es parties qui sensievent ;

Primes en ung manoir amasé ainsi quil se comporte et estend tant en grandeur d’heritaige que en fossés de eaues nommé le manoir de la prevosté tenant aux communes de la ville et as preys cottiers estant a lentour dudit lieu et fossés ;

Item en unze mesures ou environ de terre nommée le Morbane tenant vers soleil au quemin qui maine de Coiecque a Hamel, de bout d’amont a le signourie Colard Regnault que on dit le fief de Brelay ;

Item en dix mesures de terre seant au Rachynoy tenant daval as terres qui furent a Pierre de Nouviaville et debout vers mer au terroir du Maisnil.

Item les prets cotiers sont a lentour dudit manoir tenant daval et vers soleil as communes et vers mer au manoir des hoirs Simon de Lannoy que tient de present et occupe a rente tout ce que dessus dit Colard Ohier pour le somme de neuf livres parisis.

Item ledit fief se comprent aincoires en ung Bosquet nommé Labossart contenant sept ou huit mesures tant en fief que en cotterie tenant d’une part es terres Augustin de Renty, damont au quemin qui maine du Hamel a Faulquembergue que tient en son domaine ledit S^r de Gapanes vendeur.

Item en 16 mesures de terre que tient de present Guillame le Cornu de St Omeren deux pieches l’une contenant onze mesures tenant au quemin qui maine de Coiecques a Faulquembergue et daval a Augustin de Renti, l’autre pieche chincq mesures seant au riès Corbel tenant daval a Pierre Hochede et damont au fief des hoirs Guy Guillain par an paiant quinze sols de rente chascun an.

Item en unze mesures de terre que occupe Jehan Flamencq d’Audinguethun seans en le campaigne tenant vers mer a Alixandre Caverel et de bout damont au terroir d’Audinguethun par en paiant de rente chascun vingt deux sols six deniers.

Item en noef mesures de terre que tient a present Estene le Gouch et le dit S^r vendeur, assavoir ledit Estene le Gouch quatre mesures et iceluy S^r chincq seant audit riès Corbel tenant daval au quemin de Quesnel et vers mer au fief des hoirs Guy Guillain par en paiant de chascune mesure deux sols parisis de rente au terme de Noel.

Tout lequel fief ainsi quil se comporte tant en heritaiges, rentes, manoirs, preys et bos appartenences et appendences d’iceluy, iceluy S^r vendeur a rapporté et mis en nostre main lieutenant avant dit comme es mains de la justice de mes dis S^rs pour le seureté de la rente avant dite avoec la terre cotiere en accordant sur iceluy fief et terres cotieres, rentes et revenues d’iceluy fief prendre, lever, recoeuiller par le procureur receveur ou gouverneur d’ycelle eglise la dite rente aux termes et par le manière dite, et de fait apres que nous fumes acertenes que mesdis S^rs se tenoient pour comptens des droix seignoraulx que pour la vente leur en appartenoit, en fut baillié la possession et saisine de la dite rente audit Pierre Hochede procureur avant dit pour au nom de la dite eglise ses procureur ou receveur d’icelle en accordant par iceluy S^r de Gapanes vendeur, que sil ou ses aians cause estoient en faulte de bien payer icelle rente chascun an, comme dit est, que lesdis S^rs de leglise leur procureur receveur ou porteur de cestes se puissent retraire a justice et iceluy fief et cotteries faire vendre executer et adenier (etc.)

(…) ces présentes lettres, auxquelles en tesmoignaige de vérité nous avons mis noz sceaulx faictes recongnutes et passées audit lieu de Bommy comme en terre empruntée le 17^e jour de jullet lan mil quatre cens quatre vingt et quatorze et signé sur le pry : s. de lieutenant, sire Arnoul Paillart, s. Robert Hapiette, s. Marc de Roye, sire Jehan Brunet laisné, sire Jehan le Josne, et du greffe Pierre Hochede.

 

Charte du 16 novembre 1495 [11]

Sachent tout cil qui ceste chartre partie verront ou orront que pardevant amman et eschevins de la court et seignourie de Houlle comparurent en leurs personnes sire Jehan du Vert, chapelain de mons^r l’abbé de St Bertin en St Omer maistre de la fabrique dudit St Bertin, sire Falot de le Haye chambrelencq de mondit Sr et religieux dudit lieu lesquelz tant conjointement comme diviseement ont recongnut avoir baillié et accordé a Charles Roels a rente heritable chinc quartiers que terre que mares [marais] gissant a Stade listant oest audit prenneur, west Marant de le Griete, aboutant zut les mares mons^r de Gapenes et nort a une pietsente pour en joir et possesser par ledit Charles, ses hoirs ou ayans cause par en payant et rendant chascun an aux termes acoustumés seize sols six deniers parisis et ung provendier d’avoine petite mesure, commenchant premier payement Noel prochain venant lan 1496 et ainsi ensievant d’an en an et de terme en terme heritablement et a tous jours, lequel prenneur doit mettre sus pour et en assenne en plantes de souch et hayes vives pour le pris et somme de le valleur de trois années dedens les premiers trois ans primes venans, lequel Charles Roels prenneur congnut avoir ainsi prins ledit arentissement et promis de payer et accomplir tout ce que dit est dessus, et partant les dessus nommés religieux luy ont accordé et accordent la possession et saisine dudit arentissement en mettans leurs mains au veult de justice, promettans de le faire, laissier et souffrir estre en possession en bien et en paix et garandir envers et contre tous de tous empeshemens et destourbiers quelconques, et en fu ledit Charles Roels mis en bonne possession et saisine pour en joyr et possesser dores en avant ses hoirs ayans cause en forme et manière comme dit est heritablement perpetuelement et a tousjours, et furent faites observées toutes les solempnités conjures de loy et droittures paies y appartenantes selon la coustume de ladite court et seignororie, fait et passé pardevant Jacques de Latre amman, present Willaume Legouchir, Mahieu Hasselle, Jehan Racbel, Jehan Piers, Jacques Robins et Simon Falnel eschevins, le seiziesme jour de novembre l’an mil quatre cens quatre vingt quinze.

 

Charte du 13 février 1496 [12]

Sachent tous qui ces présentes verront ou orront que je Martin de Wissocq après ce que je ay esté receu et commis bailli général de l’église et abbaye de St Bertin, ay fait es mains de sire George de Brabant procureur de St Bertin, presens sire Jacques Pol, sire Guillaume Craie chantre, sire Falot de le Haie chambellan, sire Andrieu de le Cressonnière prevost d’Arques, sire Guillaume le Clercq grenetier dudit St Bertin et sire Jehan Dubois, le serment dudit office, par lequel serment jay promis et promets par ces présentes bien et loiaulement exercer ledit office, y gadder les droix de ladite Eglise et d’oultres, celler le secret de la court, faires toutes calenges, prinses, conjures et aultres choses necessaires a office de bailly, comme un bailly en tel cas commis poelt et doibt faire. Tesmoing mon scel cy mis le troisieme jour de febvrier lan mil quatre cens quatrevingt et seize.

 

Charte du 24 septembre 1502 [13]

Je Ysembart Le Visier recepveur d’Esperlecques pour ma très honourée et très doubte Dame Madame Anthoine de Rambures contesse de Meghen ; dame de Hunbercourt, de Houdaing et dudit Esperlecques, confesse avoir receu de Messieurs les Relligieux abbé et couvent de St Bertin par les mains de sire George de Breubant relligieux et procureur dudit St Bertin la somme de dix livres parisis et vingt sols dite monnoie parisis pour le relief et chambelaige d’un fief tenu de ma dite Dame a cause de sa dicte terre d’Esperlecques qui se comprend en certaine disme qui se coeulle en la dite ville et terroir dudit Esperlecques, dont il estoit deu a ma dicte Dame dix livres parisis pour le relief et vingt sols dicte monnoie pour le chambrelaige venue et eschewe ausdits religieux par le trespas et succession de feu sire Jacques Pol, lequel le avoit achetté et en estoit homme vivant et mourant pour la dicte Eglise ;

Et pour lequel fief iceulx relligieux ont baillié pour la dicte Eglise a ma dicte Dame, Jeorge de Wissocq fils Martin pour homme vivant morant et confisquant, de laquelle somme de dix livres parisis pour ledit rellief et vingt sols dicte pour le chambelaige je tiengs quicte la dite Eglise et tous aultres et tiens, en tant que a moy en est ledit Jeorge de Wissocq a homme vivant morant et confisquant pour icelle Eglise de ma dicte Dame dicelluy fief, sauf en touttes choses les drois et seigneurie de ma dicte Dame et dautruy. En tesmoing de ce jay signé ces présentes de mon saing cy mis le 24^eme jour de 7^bre lan mil cinq cens et deux. Signé Le Visier.

 

Charte du 15 juillet 1503 [14]

A tous ceulx qui ces presentes lettres verront Martin de Wissocq escuier bailly de reverend Père et en Dieu monsr l’abbé et couvent de St Bertin en St Omer salut, scavoir fay moy avoir receu le rapport et denombrement de Jehan Piers dung fief qu’il tient de mondit reverend Père en Dieu ad cause du monastère et couvent dudit lieu duquelle teneur sensuit. C’est le rapport et dénombrement que je Jehan Piers fay et baille a reverend Père en Dieu monsr l’abbé et couvent de St Bertin dung fief que je tieng et advoe a tenir de l’église et couvent d’icelluy lieu gesans en le paroisse de Houlle contenant trois mesures de terre ou environ… etc[15]. En tesmoing de ce moy bailly de St Bertin soubscript ay scelé ces presentes lettres de recipissé faites et données le quinzime jour dudit moys, an dessus dit.

 

Charte du 24 octobre 1516 [16]

C’est le rapport et dénombrement que je Anthoine de Wissocq fils aisné de deffunct Martin de Wissocq en son vivant escuier, fay et baille à pourveulx discrès et mes très honnourés seigneurs messeigneurs les religieulx abbé et couvent de St Bertin en la ville de St Omer de deux fiefs que je tieng de euls à cause de leur seignourie qu’ils ont à Wiserne ;

Dont le premier fief se comprend en six mesures ou environ de terres ahanable en deux pieches, gisans en la paroisse dudit Wiserne ; l’une pieche contenant chincq mesures ou environ, listant nort a le terre Lois de Rebecque, zud a Pierre Chappe, aboutant west a le Verde Voye qui maisne dudit Wiserne a Longuenesse, oest à le terre de mesdits seigneurs de St Bertin ; le seconde pieche contenant une mesure de terre, listant west à mes dits seigneurs, oest a Aleames Modrelois, aboutant zud à mes dits Srs, nort a Nicaze Olive et aultres.

Le second fief se comprend en deux mesures ou environ gissant au lieu nommé le Couppe aussy en la dite paroisse listant oest a Baudin Deure, west audit Pieres Chappe et aultres, aboutant zud à le terre de la vesve Baudin de Rond, nort audit Pieres Chappe, lesquels deux fiefs je tieng et advoe a tenir de mesdits tres honnourés Srs en deux hommages par la valeur de ung an de relief, le quind denier cambrelaige coustumer, le quind denier à le vente quand le cas y eschiet et serwiche du plais en le Court et salle abbacial dudit St Bertin, toutefois que j’en soray requis et adjourné souffit saument et partout alieurs ou il appartiendra avoeucq et comme mes pers et compaignons et tenans de mesdits seigneurs pareils fiefs, lequel mien rapport et dénombrement je baille et présente à mesdits Sgrs en leur requérant ou à leur bailly et officiers le recepvoir agréablement et tout par amendement, et moy en baillier lettres de recipisse a mes despens. En tesmoing de che jay mis à ces presentes mon scel armoié de mes armes le vingt quatriesme jour de octobre mil cincq cens et seize.

 

Charte du 7 octobre 1521 [17]

Je Gordian Gilleman receveur de la chastellenie d’Esperlecques pour madame la vesve de feu mr le marquis d’Arscot, cui Dieu pardoint, douagière usufructaire d’icelle chastellenie confesse avoir receu de mrs les religieux abbé et couvent de l’église de St bertin la somme de unze livres parisis pour les relief et chambellaige d’un fief tenu dudit chasteau, lequel se comprant en deux fourques de disme qui se lievent et cuiellent a Stadde paroisse dudit Esprelecques, dont George de Wissocq fils de feu Martin en son vivant a esté homme vivant morant et confiscant jusques a son trespas, au lieu duquel iceulx religieux ont denommé et baillié pour homme de semblable condition vivant morant et confiscant Gilles Roels demourant audit Esprelecques censier d’icelle dixme, lequel sera tenu de faire serment es mains du bailly pour desservir ledit fief avec les autres francs hommes de la Court dudit chastiau, comme ils sont tenus de faire, saulf en tout le droit de madite dame et l’autrui, de laquelle somme de unze livres du pris et pour cause que dessus, je suis content. Tesmoing mon saing manuel cy mis le septisme jour d’octobre anno quinze cens vingt ung. Ainsi signé, Gilleman.

 

 

[1] Bibliothèque d’agglomération de Saint-Omer, Ms. 803-05, Grand cartulaire de Saint-Bertin, volume 5, charte n°198, p. 405.

[2] Morquines : ancien hameau et seigneurie, sur les actuelles communes de Serques et de Tilques (Pas-de-Calais).

[3] Ibid, Ms. 803-06, volume 6, supplément, charte n°14, pp. 25-26.

[4] Ibid, Ms. 803-06, volume 6, supplément, charte n°16, p. 27.

[5] Ibid, Ms. 803-06, volume 6, charte n°46, p. 60.

[6] Ibid, Ms. 803-06, volume 6, charte n°76, p. 103.

[7] Le jour et le mois sont indiqués en marge.

[8] Ibid, Ms. 803-06, volume 6, charte n°238, p. 392.

[9] Ibid, Ms. 803-08, volume 8, charte n°220, p. 375.

[10] Antoine de Wissocq, seigneur de Gapennes et de Bomy.

[11] Ibid, Ms. 803-08, volume 8, charte n°237, p. 396.

[12] Ibid, Ms. 803-08, volume 8, charte n°240, p. 402.

[13] Ibid, Ms. 803-09, volume 9, charte n°28, p. 32.

[14] Ibid, Ms. 803-09, volume 9, charte n°43, p. 54.

[15] Dom Charles de Witte arrête ici la transcription de la charte faisant l’objet de ce vidimus et renvoie directement à celle-ci : « Voyez ci-dessus au n°42 jusqu’à la fin dudit rapport. »

[16] Ibid, Ms. 803-09, volume 9, charte n°201, pp. 245-246.

[17] Ibid, Ms. 803-09, volume 9, charte n°263, p. 316.